Milan

          Sa simula ng kwento, makikilala natin si Lino bilang isa sa mga bida ng pelikula. Ngunit, sino nga ba si Lino? Si lino para saakin ay isang inosenteng tao lamang na umaasang mahanap ang kanyang mahal sa buhay na nangibang bansa upang magkaroon ng maraming pera. Wala siyang alam sa buhay ng isang OFW. Siya ay nabulag lamang sa katotohanan na hindi na niya makikita ang kanyang hinahanap. Dahil sa kanyang pagnanais, umalis siya papuntang Milan upang mahanap ang kanyang minamahal. Doon niya nakita ang buhay ng isang Pilipino sa Milan. Nakita niya ang diskriminasyon at hirap na kanilang nararanasan araw-araw. Hindi siya legal na pumasok sa Milan, siya din ay niloko ng kanyang employer na nagpadala sa kanya sa Milan. Sa mga unang buwan niya, hindi muna siya nagtrabaho, may nakilala siya ng mga grupo ng mga Pilipino na kumupkop sa kanya. Noong siya ay nagtratrabaho na, napansin niya ang katotohanan na ang diploma sa Pilipinas ay kubeta lang ang katapat. Para saakin, hindi nakalimutan ni Lino na siya ay isang Pilipino parin. Nakita niya ang paninira ng mga banyaga, ngunit hindi siya nagpa-api sa kanila. Nakita din niya ang paghihirap ng mga Pilipino na mawalay sa kanilang mga minamahal sa buhay.

          Noong nasa Milan na si Lino, niloko nga siya ng kanyang employer kaya wala siyang mapuntahan. May nakilala siyang isang OFW na si Jenny. Si Jenny naman ay isang OFW na walang ginawa kundi magtrabaho. Nandoon ang sipag ng kanyang magtratrabaho, ngunit wala na yung puso. Lahat na ata ng trabaho ay pinasukan niya; kasama na ang pakikipag-relasyon sa isang banyaga. Pera lamang ang hanap-hanap niya para may maipadala sa kanyang pamilya sa Pilipinas. Kagaya ng isang karaniwang OFW, nahirapan siya sa kanyang pagkakawalay mula sa kanyang pamilya. Malungkot siya sa Milan dahil sa kanyang pagkakakayod mula sa umaga hanggang gabi, ngunit tatawag lamang ang kanyang pamilya kung meron silang kailangan. Gaya ng ibang mga Pilipino, nasilaw na sila sa salapi at nakalimutan na ang kanilang mga sarili. Binaliwala na ni Jenny ang diskrimination na nararanasan niya mula sa mga banyaga dahil sa pera.

          Kahit pangcommercial ang pelikula, pinilit parin ng direktor na maipakita ang ilan sa mga karanasan ng mga mga OFW. Pinakita nila ang hirap ng pagiging OFW sa kanilang pagtratrabaho. Kubeta lang ang katapat ng ating diploma, pinakita nila ang trabaho ng mga propesyonal na mga Pilipino na pagiging domestic helper lang ang bagsak sa ibang bansa. Ipinapakita din ang hirap ng pagkakawalay sa kanilang minamahal. Masakit din para sa kanila na tumatawag lamang ang kanilang mga mahal sa buhay kapag sila ay merong kailangan.

          May mga ipinakita din sa pelikula patungkol sa mga isyu/usapin ng isang OFW. Dahil malayo sila sa kanilang minamahal at tumatawag lamang sila kung may kailangan, nagkakaroon din sila ng isa pang pamilya sa bansang kanilang pinagtratrabauhan. Wala silang naramdaman kundi hirap. Makikita din natin ang pagloko ng isang Pilipino sa kapwa niyang Pilipino. Muntikan nang mawala si Lino sa Milan noong siya dumating dahil niloko siya ng isang employer na Pilipino. Makikita din natin ang illegal na pagpasok ng mga pinoy; tinataya nila ang kanilang mga buhay upang masubukang makamit ang pangarap na hindi naman talaga totoo.

          Para saakin, isa lamang ang mensahe ng pelikula. Ang pagiging isang OFW ay hindi magiging kasagutan sa kahirapan ng mga Pilipino. Ang pagiging OFW ay merong mga magagandang mga bagay na makakamit, ngunit mas malaki ang kapalit nitong hirap. Dahil sa hirap, nasasangkot ang mga Pilipino sa mga bagay na hindi naman talaga nila sinasadya o hindi naman nila kasalanan. Dahil sa kagustuhan sa pera, pumapasok ang mga Pilipino sa mga trabaho na hindi naman talaga nila dapat na pagtrabauhan. Malungkot ang kanilang buhay sa kabila ng pera na kanilang natatanggap.

          Bilang mga Pilipino, dapat nating mahalin ang ating mga kababayan sa ibang bansa. 'Wag na nating bigyan ng matatamis na mga salita tulad ng ating gobyerno. Harapin natin ang katotohanan, hindi madali ang buhay ng isang OFW. Pagkakawalay lamang sa kanilang mga mahal na buhay na tumatawag lamang kung meron silang kailangan, ay isang masakit na bagay para sa isang OFW. Mga Pilipino na nga tayo, may kakayahan pa tayong manloko ng kapwang Pilipino. Nawa mabuksan na tayo sa katotohan, ipagtanggol natin ang Pilipinas, hanapin natin ang kasagutan sa Pilipinas.